ក្រសួងអភិវឌ្ឍន៍ជនបទ ដែលមានឯកឧត្តម បណ្ឌិតសភាចារ្យ អ៊ុក រ៉ាប៊ុន ជារដ្ឋមន្ដ្រី មានរដ្ឋលេខាធិការប្រចាំការ ម្នាក់ គឺឯកឧត្តម បណ្ឌិត សួស គង់ និងមានរដ្ឋលេខាធិការជាច្រើននាក់ទៀត ខណៈក្នុងចំណោមរដ្ឋលេខាធិការច្រើននាក់នោះ មានឯកឧត្តម ភួង សោភា ជាប្អូនថ្លៃឯកឧត្តម រដ្ឋមន្ដ្រី និងឯកឧត្តម អ៊ុក ពញ្ញា ជាកូនបង្កើតឯកឧត្តម រដ្ឋមន្ដ្រី ហើយក្រោមរូបភាព « បណ្ដែតបណ្ដោយឲ្យដៃ » របស់ឯកឧត្តម រដ្ឋមន្ដ្រី ក៏បានធ្វើឲ្យឯកឧត្តម ភួង សោភា មានឱកាសមាស ឱកាសពេជ្រ កើនឥទ្ធិពលខ្លាំងជាងឯកឧត្តម បណ្ឌិត សួស គង់ រដ្ឋលេខាធិការប្រចាំការ ទៅទៀត ដើរតួជា « រដ្ឋមន្ដ្រីស្រមោល » នៅក្រសួងអភិវឌ្ឍន៍ជនបទ នេះ យ៉ាងរំភើយ និងហ៊ឺហា ។
ប្រភពពីមន្ដ្រីរាជការបម្រើការងារនៅក្រសួងអភិវឌ្ឍន៍ជនបទ និងបណ្ដាក្រុមហ៊ុនអនុវត្តគម្រោងមួយចំនួនបានលាន់មាត់ថា គម្រោងអភិវឌ្ឍន៍នានារបស់ក្រសួងអភិវឌ្ឍន៍ជនបទ ត្រូវបានឯកឧត្តម « រដ្ខមន្ដ្រីស្រមោល » ប្អូនថ្លៃឯកឧត្តម រដ្ឋមន្ដ្រី ប្រើល្បិចកលកាត់កងភាគរយប្រមូលយកផលប្រយោជន៍ដាក់ហោប៉ៅយ៉ាងសាហាវ គឺរហូតដល់ប្រមាណ២០ភាគរយ ឯណោះ ជាពិសេសចំពោះគម្រោងអភិវឌ្ឍន៍ ដែលប្រើប្រាស់ថវិការដ្ឋ ។
កាលពីឆ្នាំ២០២២កន្លងទៅ ក្រសួងអភិវឌ្ឍន៍ជនបទ មានខ្ទង់ថវិកាចំណាយចំនួន ៨៧០ ៤១០លានរៀល ឬប្រមាណជាង២០០លានដុល្លារអាមេរិក ( ក្នុងនោះ ថវិកាវិនិយោគសាធារណៈដោយហិរញ្ញប្បទានក្រៅប្រទេស ៥៤១ ៥១៥លានរៀល និងថវិកាជាតិ ៣២៨ ៨៩៥លានរៀល ) ។ ដូច្នេះ តាមរូបមន្ដ « កាត់កងភាគរយ » រហូតដល់ប្រមាណ២០ភាគរយ អនុវត្តដោយក្រុមមន្ដ្រីពុករលួយនៅលើគម្រោងអភិវឌ្ឍន៍នានា ដែលប្រើប្រាស់ថវិកាជាតិប្រមាណជាង៨០លានដុល្លារអាមេរិក សម្រាប់ឆ្នាំ២០២២កន្លងទៅ គឺឯកឧត្តម « រដ្ឋមន្ដ្រីស្រមោល » និងបក្ខពួក អាចប្រមូលកើបលុយដាក់ហោប៉ៅបានមិនតិចជាង១០លានដុល្លារអាមេរិក ឡើយ ។
បច្ច័យ នៃអំពើពុករលួយរបស់ឯកឧត្តម « រដ្ឋមន្ដ្រីស្រមោល » និងបក្ខពួក ក្រោមរូបភាព « បណ្ដែតបណ្ដោយឲ្យដៃ » ពីសំណាក់ឯកឧត្តម រដ្ឋមន្ដ្រី បានធ្វើឲ្យលទ្ធផល នៃការអនុវត្តគម្រោងអភិវឌ្ឍន៍នានារបស់ក្រសួងអភិវឌ្ឍន៍ជនបទ បាត់បង់ប្រសិទ្ធភាព និងមិនចំគោលដៅអភិវឌ្ឍន៍ពិតប្រាកដស្របតាមកម្មវិធីនយោបាយរបស់រាជរដ្ឋាភិបាលកម្ពុជា នោះទេ ។
ក្រុមមន្ដ្រីរាជការមួយចំនួនបាននាំគ្នានិយាយលាន់ៗថា ចាប់តាំងពីបានកាន់មុខតំណែងថ្នាក់រដ្ឋមន្ដ្រីប្រចាំក្រសួងមក គឺឯកឧត្តម បណ្ឌិតសភាចារ្យ អ៊ុក រ៉ាប៊ុន ដែលជាសមាជិកគណៈអចិន្ដ្រៃយ៍ នៃគណៈកម្មាធិការកណ្ដាលគណបក្សប្រជាជនកម្ពុជា ( CPP ) ក៏ចាប់ផ្ដើមល្បីឈ្មោះសុសសាយដែរ ពោលតាំងពីនៅកាន់តំណែងជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ រហូតត្រូវបានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ធ្លាប់លាន់មាត់ប្រកាសថា ជា « រដ្ឋមន្ដ្រីស្ពឹកស្រពន់ » ទៀតផង ហើយឥឡូវពេលបានមកកាន់តំណែងជា រដ្ឋមន្ដ្រីក្រសួងអភិវឌ្ឍន៍ជនបទ ក៏បានធ្វើឲ្យក្រសួងនេះ ត្រូវគេនិយមហៅថា ក្រសួង « អភិវឌ្ឍន៍ក្រុមគ្រួសារបណ្ឌិតសភាចារ្យ អ៊ុក រ៉ាប៊ុន » តែម្ដង ។
មជ្ឈដ្ឋានមន្ដ្រីរាជការ បានសំណូមពរចំពោះសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា មេត្តាត្រួតពិនិត្យមើល និងមានវិធានការទៅលើអំពើពុករលួយរបស់ក្រុមគ្រួសារ សាច់ញាតិរបស់ឯកឧត្តម បណ្ឌិតសភាចារ្យ អ៊ុក រ៉ាប៊ុន ជាពិសេសឯកឧត្តម « រដ្ឋមន្ដ្រីស្រមោល » ភួង សោភា នៅក្រសួងអភិវឌ្ឍន៍ជនបទ នោះឲ្យបានទាន់ពេលវេលាផង ៕
