លោក អ៊ាវ ចំរើន អតីតនាយនគរបាលថ្នាក់ឧត្តមសេនីយ៍ ក្របខ័ណ្ឌមន្ដ្រីនគរបាលជាតិកម្ពុជា នៃក្រសួងមហាផ្ទៃ អត្តលេខ ០៣៦៤១ និងអតីតជា ស្នងការ នៃស្នងការដ្ឋាននគរបាលខេត្តកណ្ដាល ទទួលបានការតែងតាំងមុខតំណែងថ្មីជា អនុរដ្ឋលេខាធិការ នៃទីស្ដីការគណៈរដ្ឋមន្ដ្រី មានឋានៈជា « ឯកឧត្តម »ដោយព្រះរាជក្រឹត្យលេខ នស/រកត/០១២៣/០៤៧ ចុះថ្ងៃទី០៥ ខែមករា ឆ្នាំ២០២៣ ។
គួររម្លឹកជូនថា កាលនៅកាន់តំណែងជា ស្នងការ នៃស្នងការដ្ឋាននគរបាលខេត្តកណ្ដាល ដោយមូលហេតុខ្វះការយកចិត្តទុកដាក់លើការគ្រប់គ្រង និងដឹកនាំ គឺលោកឧត្តមសេនីយ៍ទោ អ៊ាវ ចំរើន ដែលគេដឹងថា ជាមន្ដ្រីប៉ូលិសម្នាក់មានទ្រព្យសម្បត្តិស្ដុកស្ដម្ភនោះ ធ្លាប់ត្រូវបានក្រសួងមហាផ្ទៃ សម្រេចដាក់វិន័យក្រោមរូបភាព « ព្រមានលើកទី១ » ដោយប្រកាសលេខ ៦៤៥៩ប្រ.ក ចុះថ្ងៃទី២៥ ខែកក្កដា ឆ្នាំ២០១៩ ៕
