កាលពីអំឡុងជាង១១ឆ្នាំមុន មានសំណុំរឿងក្ដីមួយបានកើតឡើងរវាងរាជរដ្ឋាភិបាលកម្ពុជា (ស្ថាប័នអគ្គិសនីកម្ពុជា-EDC នៃអតីតក្រសួងឧស្សាហកម្ម រ៉ែ និងថាមពល) ជាមួយក្រុមហ៊ុន Cambodia Power Company (CPC) ដែលរាជរដ្ឋាភិបាលកម្ពុជា បានចំណាយថវិការហូតដល់ខ្ទង់ច្រើនលានដុល្លារអាមេរិក ទៅលើសេវាមេធាវីក្នុងការដោះស្រាយរឿងក្ដីនេះ ។
ក្រុមហ៊ុនមេធាវី ដែលទទួលបានសិទ្ធិដោះស្រាយរឿងក្ដីរវាងរាជរដ្ឋាភិបាលកម្ពុជា និងក្រុមហ៊ុន CPC នោះ គឺក្រុមហ៊ុន Sciaroni & Associates ។ កាលពីចុងឆ្នាំ២០១១កន្លងទៅ រាជរដ្ឋាភិបាលកម្ពុជា បានចំណាយថវិកាចំនួន ៩ ៩៨២ ៧០០ ០០០រៀល (ប្រមាណជាង២លានដុល្លារអាមេរិក) ទៅលើក្រុមហ៊ុនមេធាវី Sciaroni & Associates ក្នុងការដោះស្រាយរឿងក្ដីរវាងរាជរដ្ឋាភិបាល និងក្រុមហ៊ុន CPC ដែលអាចចាត់ទុកថា ជាក្រុមហ៊ុនមេធាវីចុះបញ្ជីនៅប្រទេសកម្ពុជា ដំបូងគេដែលទទួលបានកម្រៃសេវាខ្ទង់ច្រើនលានដុល្លារអាមេរិក ពីរាជរដ្ឋាភិបាលកម្ពុជា ក្នុងការដោះស្រាយរឿងក្ដីបែបនេះ ។
លើសពីនេះ នៅពាក់កណ្ដាលឆ្នាំ២០១២ រាជរដ្ឋាភិបាលកម្ពុជា បានចំណាយថវិកាចំនួន ៨ ២០០លានរៀល (ប្រមាណ២លានដុល្លារអាមេរិក) និងចុងឆ្នាំ២០១២ ចំនួន ៥ ២៣៩លានរៀល (ប្រមាណជាង១លានដុល្លារអាមេរិក) ទៀត ទៅលើក្រុមហ៊ុនមេធាវីក្នុងប្រទេស Sciaroni & Associates និងក្រុមហ៊ុនមេធាវីក្រៅប្រទេស Fresh Fields Bruckhaus Deringer ។
ក្រុមហ៊ុនមេធាវី Sciaroni & Associates គឺជាក្រុមហ៊ុនគ្រប់គ្រងដោយឯកឧត្តម ប្រេតតុន ស្ការ៉ូនី ( Bretton G.Sciaroni ) សញ្ជាតិដើមអាមេរិក បច្ចុប្បន្នមរណភាព (មរណភាពអំឡុងឆ្នាំ២០២១ ក្នុងជន្មាយុ៦៩ឆ្នាំ) ។
លោក ប្រេតតុន ស្ការ៉ូនី ( Bretton G.Sciaroni ) សញ្ជាតិអាមេរិក ទទួលបានការផ្ដល់សញ្ជាតិខ្មែរ តាមសញ្ជាតូបនីយកម្ម តាំងពីនៅមានអាយុ៥១ឆ្នាំ ដោយព្រះរាជក្រឹត្យលេខ នស/រកត/០៨០២/២៤៤ ចុះថ្ងៃទី១២ ខែសីហា ឆ្នាំ២០០២ ។ នៅអំឡុងឆ្នាំ២០០៣ លោក Bretton G.Sciaroni ក៏បានបង្កើតក្រុមហ៊ុន Sciaroni & Associates ចុះបញ្ជី និងដំណើរការសេវាកម្មនៅប្រទេសកម្ពុជា ។ លោក Bretton G.Sciaroni ធ្លាប់ទទួលបានការតែងតាំងមុខតំណែងជា ទីប្រឹក្សាច្បាប់អមរាជរដ្ឋាភិបាលកម្ពុជា មានឋានៈស្មើ រដ្ឋមន្ដ្រី ចាប់តាំងពីអំឡុងចុងឆ្នាំ២០០៤ មកម្ល៉េះ ដោយព្រះរាជក្រឹត្យលេខ នស/រកត/០៨០៤/១៦០ ចុះថ្ងៃទី០២ ខែសីហា ឆ្នាំ២០០៤ រហូតដល់ពេលមរណភាព ពោលគឺមានឋានៈជា « ឯកឧត្តម » ៕
