ចាប់តាំងពីការបង្កើតធនាគារជាតិ នៃកម្ពុជា ( National Bank of Cambodia-NBC ) មក និងនៅមុនពេលរបបសង្គមរាស្ដ្រនិយម នៃព្រះរាជាណាចក្រកម្ពុជាទី១ដួលរលំ គឺសពសម្ដេចបវរសេដ្ឋា សឺន សាន ត្រូវបានទទួលស្គាល់ថា ជាអ្នកកាន់តំណែងជា អគ្គទេសាភិបាលធនាគារជាតិ នៃកម្ពុជា បានយូរតែម្នាក់ឯងរហូតដល់រយៈពេល១៤ឆ្នាំ ( ១៩៥៥-១៩៦៩ ) ។
ឈានចូលមកដល់សម័យព្រះរាជាណាចក្រកម្ពុជា ទី២ ( ឆ្នាំ១៩៩៣ ដល់បច្ចុប្បន្ន ) គឺឯកឧត្តម ជា ចាន់តូ ត្រូវបានទទួលស្គាល់ថា ជាប់ជាឯតទគ្គបុគ្គល ជាឧត្តមមន្ដ្រីកាន់តំណែងជា អគ្គទេសាភិបាលធនាគារជាតិ នៃកម្ពុជា បានយូរជាងគេបង្អស់រហូតដល់២៥ឆ្នាំ ( ចូលកាន់តំណែងនាអំឡុងឆ្នាំ១៩៩៨ តាំងពីនៅមានអាយុ៤៧ឆ្នាំ ) ។
ឯកឧត្តម ជា ចាន់តូ ទទួលបានការតែងតាំងជា អគ្គទេសាភិបាលធនាគារជាតិ នៃកម្ពុជា ជាថ្មី មានឋានៈស្មើ ទេសរដ្ឋមន្ដ្រី ដោយព្រះរាជក្រឹត្យលេខ នស/រកត/០៥១៩/៦៤២ ចុះថ្ងៃទី២១ ខែឧសភា ឆ្នាំ២០១៩ ។
នាពេលកន្លងទៅថ្មីៗនេះ កូនស្រីរបស់ឯកឧត្តម ជា ចាន់តូ គឺលោកជំទាវ ជា សិរី អាយុ៤២ឆ្នាំ ក៏ទទួលបានការតែងតាំង និងផ្ដល់ឋានៈជា អគ្គទេសាភិបាលរងធនាគារជាតិ នៃកម្ពុជា មានឋានៈស្មើ រដ្ឋមន្ដ្រី ផងដែរ ដោយព្រះរាជក្រឹត្យលេខ នស/រកត/០៣២៣/៣៦៧ ចុះថ្ងៃទី០១ ខែមីនា ឆ្នាំ២០២៣ ៕
