កាលពីថ្ងៃទី២០ ខែមីនា ឆ្នាំ២០២៣កន្លងទៅថ្មីៗនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានសរសេរលិខិតផ្លូវការមួយច្បាប់ផ្ញើជូន អ្នកឧកញ៉ា ជឹង សុភាព និងស្វាមី ក្នុងន័យសម្ដែងនូវការថ្លែងអំណរគុណចំពោះអ្នកឧកញ៉ា និងស្វាមី ដែលបាន
ជួយឧបត្ថម្ភថវិកាចំនួន ៥០០ ០០០ (ប្រាំរយពាន់) ដុល្លារអាមេរិក សម្រាប់ថតភាពយន្ដភាគរឿង « កូនប្រុសក្រោមពន្លឺព្រះចន្ទពេញបូណ៌មី » ។
អនុលោមតាមស្មារតីលិខិតផ្លូវការរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ខាងលើនេះ គឺបានចង្អុលបង្ហាញឲ្យឃើញថា ឧកញ៉ា ជឹង សុភាព ទទួលបានគោរមងារជា អ្នកឧកញ៉ា រួចទៅហើយ ។
គេហទំព័រសារព័ត៌មាន ដើមត្នោត ( DTN7.Com ) មិនទាន់បានឃើញឯកសារព្រះរាជក្រឹត្យណាមួយ ដែលផ្ដល់គោរមងារជា អ្នកឧកញ៉ា ជូនឧកញ៉ា ជឹង សុភាព នៅឡើយ ឬក៏មានរួចទៅហើយ ប៉ុន្តែសារព័ត៌មាន ដើមត្នោត មិនទាន់បានឃើញ ?
លោកជំទាវ ជឹង សុភាព អនុប្រធានកាកបាទក្រហមកម្ពុជា ( CRC ) ត្រូវជាភរិយារបស់ឯកឧត្តម ឧកញ៉ា ឡាវ ម៉េងឃីន សមាជិកព្រឹទ្ធសភា នៃព្រះរាជាណាចក្រកម្ពុជា និងដែលគេស្គាល់ថា ជាអ្នកជំនួញដ៏មានឥទ្ធិពលស្និទ្ធនឹងក្រុមគ្រួសារនាយករដ្ឋមន្ដ្រី ទទួលបានការតែងតាំងគោរមងារជា ឧកញ៉ា ដោយព្រះរាជក្រឹត្យលេខ នស/រកត/១១០៦/៤៤៣ ចុះថ្ងៃទី០៨ ខែវិច្ឆិកា ឆ្នាំ២០០៦ ។
វចនានុក្រមខ្មែរ ដែលរៀបរៀងដោយសម្ដេចព្រះសង្ឃរាជ ជួន ណាត បានធ្វើការចាត់ចំណាត់ថ្នាក់ ឧកញ៉ា តាមលំដាប់ថ្នាក់ស័ក្ដិធំតូច ដូចជា លោកអ្នកឧកញ៉ា, អ្នកឧកញ៉ា និងឧកញ៉ា ។
មជ្ឈដ្ឋានអ្នកវិភាគកិច្ចការសង្គមនៅកម្ពុជា បានបញ្ចេញទស្សនៈថា ប្រសិនបើមានករណីប្រើប្រាស់ ឬហៅគោរមងារ ឧកញ៉ា ខុសឆ្គង តាមបែបអនាធិបតេយ្យ ឬតាមទំនើងចិត្ត គឺជាការប្រមាថ ឬមិនផ្ដល់តម្លៃចំពោះព្រះរាជក្រឹត្យ ដែលត្រាស់បង្គាប់តែងតាំង ឬផ្ដល់គោរមងារបុគ្គលណាម្នាក់ដោយព្រះករុណាព្រះមហាក្សត្រ ជាទីសក្ការៈយ៉ាងគឃ្លើនបំផុត ៕
