ឯកឧត្តម លី ណារុន ដែលជាសមាជិកក្រុមប្រឹក្សាជាតិប្រឆាំងអំពើពុករលួយ ( មានឋានៈស្មើ រដ្ឋមន្ដ្រី ) មួយរូប ទទួលបានការតែងតាំងមុខតំណែងបន្ថែមជា រដ្ឋលេខាធិការ នៃក្រសួងអភិវឌ្ឍន៍ជនបទ ដោយព្រះរាជក្រឹត្យលេខ នស/រកត/០៣២៣/៣៩៧ ចុះថ្ងៃទី០៧ ខែមីនា ឆ្នាំ២០២៣ ខណៈការតែងតាំងមុខតំណែងបន្ថែមជូនឯកឧត្តម លី ណារុន នេះ គឺបានកើតមានឡើងបន្ទាប់ពីថ្នាក់ដឹកនាំមានឋានៈជា រដ្ឋលេខាធិការ នៃក្រសួងអភិវឌ្ឍន៍ជនបទ ចំនួនពីរនាក់ជាសាច់ញាតិ ក្រុមគ្រួសាររបស់ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្ដ្រីក្រសួងអភិវឌ្ឍន៍ជនបទ ត្រូវបានមន្ដ្រីរាជការក្រោមឱវាទ ដែលសុំមិនបញ្ចេញអត្តសញ្ញាណដាក់ពាក្យប្ដឹងចោទប្រកាន់ពីបទ ប្រព្រឹត្តអំពើពុករលួយជាប្រព័ន្ធ ទៅកាន់អង្គភាពប្រឆាំងអំពើពុករលួយ ( ACU ) នាពេលកន្លងទៅថ្មីៗ ។
គួររំលឹកជូនថា កាលពីថ្ងៃទី២៧ ខែមករា ឆ្នាំ២០២៣កន្លងទៅ ក្រុមមន្ដ្រីរាជការបម្រើការងារនៅក្រសួងអភិវឌ្ឍន៍ជនបទ ដែលសុំមិនបញ្ចេញអត្តសញ្ញាណ បានដាក់ពាក្យបណ្ដឹងគោរពជូនឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ដ្រី ទទួលបន្ទុកប្រធានអង្គភាពប្រឆាំងអំពើពុករលួយ ដោយប្ដឹងសុំឲ្យមានការស៊ើបអង្កេតស្រាវជ្រាវ និងចាត់វិធានការតាមផ្លូវច្បាប់ជាធរមានទៅលើការប្រព្រឹត្តអំពើពុករលួយជាប្រព័ន្ធរបស់ឯកឧត្តម ភួង សោភា និងឯកឧត្តម អ៊ុក ពញ្ញា ដែលជារដ្ឋលេខាធិការ នៃក្រសួងអភិវឌ្ឍន៍ជនបទ ព្រមទាំងបក្ខពួកនៅក្នុងក្រសួងអភិវឌ្ឍន៍ជនបទ ខណៈរហូតមកទល់បច្ចុប្បន្ននេះ មិនទាន់ឃើញមានចំណាត់ការយ៉ាងណាៗពីអង្គភាពប្រឆាំងអំពើពុករលួយ ( ACU ) នៅឡើយទេ ។
ថ្លែងរៀបរាប់តាមរយៈគេហទំព័រសារព័ត៌មាន ដើមត្នោត ( DTN7.Com ) ក្រុមមន្ដ្រីរាជការបម្រើការងារនៅក្រសួងអភិវឌ្ឍន៍ជនបទ ដែលជាម្ចាស់ពាក្យបណ្ដឹងសុំមិនបញ្ចេញអត្តសញ្ញាណទាំងនោះ បានធ្វើសំណូមពរចំពោះឯកឧត្តម លី ណារុន សមាជិកក្រុមប្រឹក្សាជាតិប្រឆាំងអំពើពុករលួយ និងជារដ្ឋលេខាធិការ នៃក្រសួងអភិវឌ្ឍន៍ជនបទ មេត្តាមានវិធានការ « ប្រឆាំង » ដោយកុំចូលរួម « ប្រថាប់ត្រា » អំពើពុករលួយនៅក្នុងក្រសួងអភិវឌ្ឍន៍ជនបទ ដើម្បីពង្រឹង និងបង្កើនគុណភាព ប្រសិទ្ធភាព នៃការអនុវត្តគម្រោងអភិវឌ្ឍន៍ជនបទ ព្រមទាំងរក្សាជំនឿទុកចិត្តរបស់ប្រជាពលរដ្ឋទៅលើកម្មវិធីនយោបាយអភិវឌ្ឍន៍ជនបទរបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ជាប្រមុខ ៕
